இலக்கணப் பிழையா
இலக்கணமே பிழையா
-------------------------
இலக்கணப் பிழையில்
பிறந்தவன்
இருநூறு கோடி
இலக்கணங்கள் சொல்கிறான்.
அவனுக்கு தெரியாதோ
அவனே ஒரு இலக்கணப் பிழை.
பிரபஞ்ச தோற்றம்
இலக்கணப் பிழை!
பரிணாமத்தின் ஒவ்வொரு
படியிலும் ஏதோஓர்
இலக்கணப் பிழை!
குரங்கின் இலக்கணப் பிழை
குலப் பெருமை பேசுகிறது.
சீர்மைக்குள் சிக்கிய சில்லரைகள்
இலக்கண பிழைகளை
எள்ளி நகைக்கிறது.
தெற்றுப் பல்
ஒற்றை மரு
கன்னக்குழி
ஒவ்வொரு இலக்கணப் பிழையிலும்
ஏதோ
ஓர் அழகு.
பிழைதான் அழகென்றாகிவிட்டது
அப்புறமென்ன இலக்கணத்துடன்
பிழையிலி பிணக்கு!
இலக்கணப் பிழைகள்
படைத்த இலக்கணம்
பிசகிப் போய்தானே இருக்கும்!
இலக்கணம் நிறைய எழுதுங்கள்
அடுத்த கணமே பிழைபட!
இலக்கணப் பிழையாய் அவளும்
இலக்கணமே பிழையாய் நானும்
புத்தம் புது இலக்கணம் படைக்கிறோம் !
உடனே பிழைபட !